.
શબ્દરૂપે અવતરે કેવળ કૃપા
શ્વાસમાં છાને પગે પણ સંચરે કેવળ કૃપા.
.
ઝાડ ને ઝરણાં બધાં વ્હેતાં રહે છે આંખમાં.
સામટું આકાશ પણ ટોળે વળે છે પાંખમાં.
.
ભીતરે ભગવી ધજા થૈ ફરફરે કેવળ કૃપા
શબ્દરૂપે અવતરે કેવળ કૃપા
.
એક પંખી ડાળ પર બેસી સતત ગાતું રહે.
પોત ટહુકાનું સહજ રીતે જ બંધાતું રહે.
.
વ્હાલનું વાદળ થઈને ઝરમરે કેવળ કૃપા.
શબ્દરૂપે અવતરે કેવળ કૃપા
.
કોઈ આવીને બધો અંધાર ઉલેચી ગયું.
છેક ઊંડે એમ આપોઆપ અજવાળું થયું !
.
એ જ છે આધાર સાચો આખરે કેવળ કૃપા
શબ્દરૂપે અવતરે કેવળ કૃપા
.
( નીતિન વડગામા )