દોડી શક્યો નહીં – ઉર્વીશ વસાવડા
મારી ઉપર છે આળ હું દોડી શક્યો નહીં
તેં તો દીધો’તો ઢાળ હું દોડી શક્યો નહીં
.
ભાગી જવામાં સાથ ચરણનો ન સાંપડ્યો
ઠેકી શક્યોના પાળ હું દોડી શક્યો નહીં
.
દાવાનળોમાં એટલે સળગી જવું પડ્યું
લાગી’તી જ્યારે ઝાળ હું દોડી શક્યો નહીં
.
એ આવશે એંધાણ મળ્યું એનું એ છતાં
એવી પડી’તી ફાળ હું દોડી શક્યો નહીં
.
આજે સૂતો છું આમ અહીં એ જ કારણે
પાછળ ઊભો’તો કાળ હું દોડી શક્યો નહીં
.
( ઉર્વીશ વસાવડા )