માણસની વસ્તી – અશરફ ડબાવાલા
માણસની વસ્તી જોને મને છોડતી નથી,
મારીયે હસ્તી જોને મને છોડતી નથી.
.
હું બંદગી કરું તો કરું કેમ કોઈની ?
આ લયપરસ્તી જોને મને છોડતી નથી.
.
ઊડવાથી પર થવાનાં છે કારણ અનેક પણ,
પાંખો અમસ્તી જોને મને છોડતી નથી.
.
નહિતર તો માહિતીના શિખર પર બિરાજું છું,
જૂની આ પસ્તી જોને મને છોડતી નથી.
.
અશરફ ! હું કેમ પહોંચું ચરણની સીમા સુધી ?
પગલાંની મસ્તી જોને મને છોડતી નથી.
.
( અશરફ ડબાવાલા )