રાહ મારી હું જ જ્યાં જોતો નિરંતર ત્યાં જવું છે,
હું અને કુદરત અને જ્યાં માત્ર ઈશ્વર ત્યાં જવું છે.
.
ને શિખર, કેડી મહેકતાં જંગલો-ઝરણાં ઊછળતાં,
ના તસુભરનુંય લાગે કોઈ અંતર ત્યાં જવું છે.
.
મૌન કેવળ મૌન ધબકારા હૃદયના સંભળાતા,
ને સ્વયમ હોવા પણું થઈ જાય અવસર ત્યાં જવું છે.
.
લાગણીનું, ભાવનું, સ્પંદનનું ચલણી માત્ર નાણું,
કામ ના આવે કશી સમજના કે અક્ષર ત્યાં જવું છે.
.
કોઈને ના કોઈની સ્હેજે પડી સૌ મસ્ત ખુદમાં,
એકસરખા હોઈએ જ્યાં બ્હાર-અંદર ત્યાં જવું છે.
.
ને ઘણીયે વાર ઘર છોડી અને જાવા ચહું ત્યાં,
રોકતાં ને પૂછતાં આ દ્વાર-ઊંબર, ક્યાં જવું છે ?
.
( રાજેશ વ્યાસ ‘મિસ્કીન’ )