દરિયાની રેતીમાં ચીતરેલું નામ તારું
દરિયાના મોજાં સંગ વહેતું
છીપલાની જેમ હુંય આવતો કિનારે ને
દરિયામાં ધ્યાન પછી રહેતું
.
ભૂરું આકાશ અને ધરતી ક્ષિતિજ પર
લાગે છે દૂર છતાં પાસે
આપણીય વચે દીવાલ જાય તૂટી તો
આપણેય મળવાનું થાશે.
.
આવજો કહીને તારા લંબાતા હાથને
મારાથી દૂર કોણ લેતું ?
દરિયાની રેતીમાં ચીતરેલું નામ તારું
દરિયાના મોજાં સંગ વહેતું
.
દરિયામાં દૂર લગી વિસ્તરતા પાણી ને
છૂટતા કિનારા તો ઠીક
તારાથી દૂર હવે એકલા રહીને મને
લાગે છે મારીએ બીક
.
મનની ચોપાટ મારે એકલા જ રમવાની
તોય કોક જીતવા ના દેતું
દરિયાની રેતીમાં ચીતરેલું નામ તારું
દરિયાના મોજાં સંગ વહેતું
છીપલાની જેમ હુંય આવતો કિનારે ને
દરિયામાં ધ્યાન પછી રહેતું
.
( તેજસ દવે )