તમારા ઘરનાં દીવા રાતે રસ્તામાં હતા કે શું ?
પવન ફંટાઈ જાશે, એ ભરોસામાં હતા કે શું ?
.
ઘરે પહોંચ્યોં તો દરવાજાએ પૂછ્યું ક્યાંથી આવો છો ?
સુગંધ આ શેની છે, સાંજે બગીચામાં હતા કે શું ?
.
તમારા દિલના ધબકારા અજાણ્યા કેમ લાગે છે !
તમે પણ કાલે તરણેતરના મેળામાં હતા કે શું ?
.
ઘણી વાતો, ઘણાં વર્ષો પછી કાલે કહી નાખી,
હવે એ પણ કહો, ગઈ રાતે સ્વપ્નામાં હતા કે શું ?
.
તમે ચુપચાપ સાંભળતા રહ્યા, નિર્લેપ દ્રષ્ટિથી,
કે મારી રૂબરૂ બીજી જ દુનિયામાં હતા કે શું ?
.
દિવસ રઘવાટમાં કાઢ્યો ને રાતે પણ નથી સૂતા,
તમારા પણ વહાણો કાલે દરિયામાં હતા કે શું ?
.
ફરી બેચાર પથ્થર એ તરફથી આ તરફ આવ્યા,
તમે પાછા ખલીલ એના જ ફળિયામાં હતા કે શું ?
.
( ખલીલ ધનતેજવી )