પ્રશ્ન ક્યાં છે ? જવાબ પણ ક્યાં છે ?
હાથમાં મુજ કિતાબ પણ ક્યાં છે ?
.
કે મળો આપ ને હસી ન શકું,
એટલાં દી’ ખરાબ પણ ક્યાં છે ?
.
કેમ તું ફૂલદાનીને રોવે ?
મુજ કને ફૂલછાબ પણ ક્યાં છે ?
.
મરતબો-માન, પગ કરી જાતાં,
નિત્ય ચાલે, રૂઆબ પણ ક્યાં છે ?
.
કેમ સરખાવે ચાંદથી મુજને ?
મુજ શીતળતા-શબાબ પણ ક્યાં છે ?
.
કેમ ના થાય ? આંખ, ઊંઘણશી !
કનડે એવાં ય ખ્વાબ પણ ક્યાં છે ?
.
રાત વીતી ગઈ ‘સિકંદર’ પણ-
ક્યાં ઉષા ? આફતાબ પણ ક્યાં છે ?
.
( સિકંદર મુલતાની )
