આપો તો આપો રે અમને નાવડી,
આપો આપો દરિયાલાલ
ડૂબ્યાં તો મઝધારે તળિયાં તાગશું.,
તર્યા તો ઊતરશું ભવપાર.
આપો તો આપો રે અમને નાવડી…
.
આપો તો આપો રે એક સાંઢણી,
આપો માથે માઝમરાત;
ઝાંખે રે અજવાળે જાશું પાંસરા,
જાવું એને રે દરબાર.
આપો તો આપો રે એક સાંઢણી…
.
આપો તો આપો રે લેખણ લાકડી,
માથે સરસતીના હાથ;
લોહીને ટશિયે રે લખવાં નોતરાં,
ઈને દેશું હાથોહાથ.
આપો તો આપો રે લેખણ લાકડી…
.
આપો તો આપો તે કેડી સાંકડી,
આપો ડુંગરાની ધાર;
પીગળતે પંડ્યે રે પગલાં માંડશું,
ના ક્યાંય પહોંચ્યાની દરકાર.
આપો તો આપો રે કેડી સાંકડી…
.
( મધુમતી મહેતા )