એક દિવસ એવો ઊગશે
કે જ્યારે હું ભૂલી ગયો હોઈશ :
મારું નામ, સરનામું અને
મારાતમારા સૌના
ટેલિફોન નંબર.
.
એક દિવસ એવો ઊગશે
કે તમારી આંખ સામે
મારો ચ્હેરો તરવરશે
તમારી સ્મૃતિમાં રમતા હશે
મારા અવાજના પડઘાના
પડછાયાઓ.
.
એક દિવસ એવો ઊગશે
કે જ્યારે હું સવારનું અજવાળું થઈને
તમારા ખંડમાં પ્રવેશીશ
અને સાંજને સમયે
નીકળી જઈશ ચિરપરિચિત હવાની જેમ
તમારી જ બારીએથી
અને ક્યાંક શિખર પર જઈને
ઠરીશ ન ઠરીશ
અને ફરી પાછો ફરીશ
કોઈ સવારે અજવાળું થઈને.
.
( સુરેશ દલાલ )