ઉછીનાં શ્વાસને આધાર જીવી તો જવાનું છે,
મળે આ પાર, સામો પાર જીવી તો જવાનું છે.
.
મળે છે ક્યાં કદી ચાહ્યું હતું એ જિંદગીમાં તો,
પરોઢી સ્વપ્નને અણસાર જીવી તો જવાનું છે.
.
કરે છે કલ્પના એનાં વિશે પણ કોઈ ફાવ્યું છે ?
ભલે ને હોય જે આકાર જીવી તો જવાનું છે.
.
વને ફરતાં મળે પંખી અને ટૌકાય મધમીઠાં,
કદી હો રણ, કદી હો ખાર જીવી તો જવાનું છે.
.
રચાતાં છળકપટ ને વળગણો પણ સામટાં પજવે,
ઉપાડી જિંદગીનો ભાર જીવી તો જવાનું છે.
.
( હરીશ પંડ્યા )
