હતું શું, છે નગરમાં આપના બોલો
રહ્યું શું છે નગરમાં આપના બોલો
.
અજાણ્યા થઈ મળે છે એકબીજાને
થયું શું છે નગરમાં આપના બોલો
.
ગલી, ઘર, બારણાં, બારી અને ભીંતો
નવું શું છે નગરમાં આપના બોલો
.
તળિયેથી ઉલેચીને બધ્ધું પી ગયાં
વધ્યું શું છે નગરમાં આપના બોલો
.
ન ખાલીપો, ન પડછાયા નથી ડૂમો
બચ્યું શું છે નગરમાં આપના બોલો
.
ગયા જેઓ, કદી પાછા નથી આવ્યા
જવું શું છે નગરમાં આપના બોલો
.
હકીકત સાવ પોલી છે હકીકતમાં
નર્યું શું છે નગરમાં આપના બોલો
.
( શીતલ જોશી )