ગીત જડ્યાં તે ગાયાં ને ? બસ, કવિ થવાની જરૂર શું છે ?
ભલે થયું; અજવાળું થ્યું ને ? છળી પડ્યાની જરૂર શું છે ?
.
નભ વરસ્યું ને નાહ્યા એની મોજ મળી તે માણો
ભીનાં થયાનાં અવસર છે તે જ્ઞાન સમૂળુ છાંડો
જાત તો જેવી ને તેવી છે નવી કર્યાની જરૂર શું છે ?
ગીત જડ્યાં તે ગાયાં ને ? બસ, કવિ થવાની જરૂર શું છે ?
.
હોય તો અનરાધાર પંડને ભૂલવાડી દે તેવું
કબૂલ કીંતુ તે ક્ષણ વીત્યે નથી ટપકતું નેવું
પળના ઝબકારાને કાયમ ગણી ગયાની જરૂર શું છે ?
ગીત જડ્યાં તે ગાયાં ને ? બસ, કવિ થવાની જરૂર શું છે ?
.
મટી જવાની લીલા છે કંઈ બનવાનો આધાર નથી આ
જળ વાયુ કે તેજ સમજ કંઈ પથ્થરના આકાર નથી આ
ઘણું ગ્રહેલું ભૂલવાડે તે છવી ગ્રહ્યાની જરૂર શું છે ?
ગીત જડ્યાં તે ગાયાં ને ? બસ, કવિ થવાની જરૂર શું છે ?
.
( ધ્રુવ ભટ્ટ )
