વાત બદલીને ફરી એ વાત લાવો છો, તમે પણ…
માંડ કાપીએ દિવસ ત્યાં રાત લાવો છો, તમે પણ…
હું સજું શણગાર તો બોલો સજું પણ કેવી રીતે ?
જોઉં જ્યાં દર્પણ તો વચ્ચે જાત લાવો છો, તમે પણ…
રંગ કોઈ એક ઘૂંટી રંગવા ખુદને મથું છું,
ને ઉપરથી રંગ નૂતન સાત લાવો છો, તમે પણ…
છે દિવસ સહિયારો, પણ આ રાત છે સુવાંગ મારી;
ત્યાંય યાદોની પૂરી બારાત લાવો છો, તમે પણ…
આંખથી સોળે કળાએ દ્રશ્ય જોયું ન્હોતું ‘સુધીર’,
આંખ મીંચી એમાં નોખી ભાત લાવો છો, તમે પણ…
( સુધીર પટેલ )
