છું હું શૂન્ય-શૂન્યની ન્યાતમાં-ન તમારી કોઈ મિસાલ છે,
રૂંવેરૂંવે લોહી-લુહાણ હું-ને તમારું હોવું ગુલાલ છે.
હું અને વીતેલા સમયની વચ્ચે ફરક લગારે નથી મળ્યો,
હુંય પણ અધૂરો ખયાલ છું-એય પણ અધૂરો ખયાલ છે.
રહ્યા જીવજીને પરમ મુકામે લઈ જવામાં રચ્યા-પચ્યા,
તમે જેને શ્વાસ કહો છો એ તો સ્વયં હરિના હમાલ છે.
મેં દિવસ ને રાત જે જિંદગીને ગળે લગાવી ફર્યા કર્યું,
એ તો રણની રેતે લૂંટી લીધેલી જળવિહોણી પખાલ છે.
મને જીવવા સમી જિંદગીની લગારે લાગી નથી કદી,
હું ખુશીથી જીવું છું એ બધો-તમારી કૃપાનો કમાલ છે.
જે તમારે દ્વાર પહોંચીને ન તમારા હાથમાં આવી હો,
આ તમારો ‘સાહિલ’ ખુદ પ્રભુએ લખેલી એ જ ટપાલ છે.
( સાહિલ )