કોઈના સૂરજને કાં ઝાંખો કરો,
પોતપોતાના ઘરે દીવો કરો.
.
પગ સલામત છે, ફક્ત ઊભો કરો
ચાલવા મંડી જશે ટેકો કરો.
.
જે કશું ખૂટતું હશે, સરભર થશે,
પગ તમે ચાદર મુજબ લાંબા કરો.
.
આગ તો છે અર્થની તાસીરમાં,
શબ્દ ફાવે તેટલો ઠંડો કરો.
.
સાંજ લગ આકાશગંગા થઈ જશે,
ભીંત પર ખાલી તમે લીટો કરો.
.
હા, વિવેચક છો તમે જાણું છું હું,
પણ જરા આઘા ખસો, રસ્તો કરો.
.
આપ છો ભાષાભવનના માસ્તર,
લો, જરા ટહુકાનો તરજૂમો કરો.
.
એ ખલીલ આવ્યા છે પાટો બાંધવા,
ખોતરીને ઘાવને મોટો કરો.
.
( ખલીલ ધનતેજવી )