એને નમન જે તળમાં સમજીને નથી આવ્યું.

પરબારું આવ્યું જે એ અટકીને નથી આવ્યું.

કાગળ-કલમથી એને પોંખીને વધાવી લ્યો,

આ વાદળું તો ક્યાંયે વરસીને નથી આવ્યું.

આવ્યું છે નેક નિય્યત ને અડગ ઈરાદાથી,

અસ્તિત્વ તારા છળમાં લપસીને નથી આવ્યું.

આ સ્મિત છે જે રૂપો બદલીને છેતરે છે,

આંસુ કદીયે વાઘા બદલીને નથી આવ્યું.

મુફલિસ હો કે તવંગર તારી આ બજારેથી

કોઈ નથી જે ખુદને ખરચીને નથી આવ્યું.

અશરફ લિબાસ એવો પહેરીને ફરે છે કે,

સપનું હજી તો જેનું દરજીને નથી આવ્યું.

( અશરફ ડબાવાલા )