આડું જોયું, અવળું જોયું-ક્યાંય મળ્યું નહીં મોતી

અડખે જોયું, પડખે જોયું-ક્યાંય મળ્યું નહીં મોતી .

ઝાકળ ઝાકળ રમતાં વાગ્યો

તૃણનો લીલો કોંટો

દરિયો લૈ નીકળ્યા તો સામે

મળી ગયો પરપોટો !

પાંપણ પરથી આંસુ લોહ્યું-ક્યાંય મળ્યું નહીં મોતી

આડું જોયું, અવળું જોયું-ક્યાંય મળ્યું નહીં મોતી.

અમથી અમથી જીદ કરીને

અવસર માગી લીધા

પછી ઘરના છાના ખૂણે

અમે એકાંતો પીધાં !

પળમાં મળ્યું, પળમાં ખોયું-ક્યાંય મળ્યું નહીં મોતી

આડું જોયું, અવળું જોયું-ક્યાંય મળ્યું નહીં મોતી.

( લાલજી કાનપરિયા )