એક વૈકલ્પિક અંજળ મોકલું છું,
સાચવેલી આખરી પળ મોકલું છું.
.
હાથની સાથે ઘણું ધ્રુજી રહ્યું છે,
છેવટે કોરો જ કાગળ મોકલું છું.
.
કૈંક રાતોનાં ભર્યાં છે સ્વપ્ન તેમાં,
ઓ સૂરજના દેશ ! ઝાકળ મોકલું છું.
.
કીમતી બીજું તે શું લાગે તરસને,
ઓણનું પ્રત્યેક વાદળ મોકલું છું.
.
કોડિયું તો જાય બુઝાઈ ઘડીમાં,
એક કેવળ પ્રાણ ઝળહળ, મોકલું છું.
.
એ જ જાણે છે બધું કહેશે નિરાંતે,
મૌન જે શબ્દોની પાછળ મોકલું છું.
.
એક મિસ્કીનના થયા છે લાખ ટુકડા,
ખુશનસીબી છે, પળેપળ મોકલું છું.
.
(રાજેશ વ્યાસ “મિસ્કીન”)
Nice Gazal.
Nice Gazal.