વાયરો જ્યાં અડે છે પાણીને,
કેવી મસ્તી ચડે છે પાણીને.
.
રોજ ફૂટે છે કૈંક પરપોટા,
ક્યાં કશો ઘા પડે છે પાણીને.
.
આમ નહિતર વમળ ન હોય કદી,
પાણી પોતે નડે છે પાણીને.
.
ગર્મ રેતીમાં શોષવાઈ જતાં,
ક્યાં તરસ આભડે છે પાણીને.
.
જાતમાં ભૂસ્કો મારવા માટે,
ધોધ થાવું પડે છે પાણીને.
.
પાણી, પાણીને મળશે દરિયામાં,
ક્યાં કદી રણ જડે છે પાણીને.
.
આભમાં જઈને ભોંય પર પડવું,
શી રીતે પરવડે છે પાણીને.
.
આંખને ભીંજવે અમસ્તી પણ,
એ રમત આવડે છે પાણીને.
.
( ખલીલ ધનતેજવી )
