મંદ મંદ આ મહેક ઊઠી છે ચાલો રસભર થઈએ
એકમેકના મનમાં એવો સુંદર અવસર થઈએ
.
અંધારું અંધારે બાંધી
અજવાળે અજવાળું
ચાલ ખોલીએ કૂંચી થઈને
વાદળ નામે તાળું
.
તાળું ખોલી ધીમું બોલી ઝરમર ઝરમર થઈએ
મંદ મંદ આ મહેક ઊઠી છે ચાલો રસભર થઈએ
.
જળ પર વહેતાં લીસ્સાં લીસ્સાં
તરંગ વસ્ત્રો ખેંચી
કયું કામ કોને કરવાનું
ચાલો લઈએ વ્હેંચી
.
કૂણી કૂણી કમળ પાંદડી વચ્ચે ઘર ઘર થઈએ
મંદ મંદ આ મહેક ઊઠી છે ચાલો રસભર થઈએ
.
( અનિલ ચાવડા )
અનિલભાઈની રચનામાં ખૂબજ માર્મિક રજૂઆત હોઈ છે ! સુંદર રચના !
અનિલભાઈની રચનામાં ખૂબજ માર્મિક રજૂઆત હોઈ છે ! સુંદર રચના !