ભાઈ દે તો મિત્ર જેવો ભાઈ દે,
જિન્દગી અથવા તો એકલવાઈ દે !
.
તું ખુદા શિખર દે અથવા ખાઈ દે,
પણ મને જીવનમાં બેપરવાઈ દે !
.
લાખ અપરાધો ભલેને એ કરે,
જીભ પર એની ફક્ત સચ્ચાઈ દે !
.
એ પછી તો સો વરસ જીવી શકીશ,
મોતને વાતોમાં તું અટવાઈ દે !
.
જ્યાં ને ત્યાં જોયા કરે છે ચોતરફ,
એની આંખોમાં નજર સલવાઈ દે !
.
જો વિવેચક, હું સરળ રસ્તો કહું ?
આ ગઝલને મોરથૂથૂં પાઈ દે.
.
મુખ્ય લોહીની સગાઈ પણ ખલીલ,
મા પછી તું મિત્રને સરસાઈ દે !
.
( ખલીલ ધનતેજવી )