આજે ખૂણા યાદ આવ્યા,
કેસરી, લીલાં, ભૂરાં કિરણો વચ્ચે રચાતા
દેખા, અણદેખા કરી આગળ વધતા,
સ્મૃતિપટ પર વિહરતા
કાળમીંઢ પથ્થર જેવા
.
એ તરફ પહોંચી જોઉં તો-
ખૂણા મૃગજળ થયા
દ્રષ્ટિ એની લગોલગ છતાં દૂર
.
આજે તો આંખથી જ સ્પર્શ કરું-
ભય હંમેશાં રોકે
ખબર નહીં ખૂણા શું દેખાડે ?
સ્મૃતિ વીખરાઈ જશે તો ?
વીણવામાં જીવન વીતી જશે તો ?
.
વધુ પાસે પહોંચી જોયું-
એક નથી
આવા અગણિત ચારે તરફ દટાઈને પડ્યા છે ખૂણા :
આ ખૂણા મારા ?
ક્યારે ભેગા કર્યા ?
એકેનો ભાર કેમ ના લાગ્યો ?
.
આજે ખૂણા ખોલવા છે
હાથ લંબાવું તો ખૂલે
શક્ય છે એમાં વિવિધ રંગી આકાશી તેજ હશે
પતંગિયાં ને મધુરસ હશે
ઈચ્છાઓનાં મૂળ હશે
.
આટલો અમથો ખૂણો ને આટલું મોટું વિશ્વ ?
નિરાકાર ?
એમાંનો કયો તારશે ?
શક્તિનો સંચાર કરશે ?
વિસ્તારશે ?
.
( આકાશ નાયક )