હવામાં કેફ છે, વાતાવરણ ચકચૂર છે સાકી
અહીં તો કાંકરીચાળોય ઘોડાપૂર છે સાકી
.
પરિચિત ગંધની પાછળ અમે ખેંચાઈ તો આવ્યા
લથડતી ચાલ છે ને ઘર અમારું દૂર છે સાકી
.
અહીં પીનારાનાં ઓવારણાં લેવાય છે હરપલ
અહીંનાં ઝુમ્મરોમાં બાદશાહી નૂર છે સાકી
.
કહી દો રાતને, છેલ્લા પ્રહરનો દોર માણી લે-
બચેલા શ્વાસ પૂરતો માપસર સુરુર છે સાકી
.
અહીંની ફર્શ, છત, દીવાલ મિસ્ર-એ નઝમ લાગે
તરન્નુમમાં તમારું બાજતું નૂપુર છે સાકી
.
( કુમાર જૈમિની શાસ્ત્રી )