આપ સાચવે સાચ એટલે દીવા માન્યા પાંચ
પરપોટા જ્યાં પાંચ એટલે દીવા માન્યા પાંચ
.
ઘરમાંથી ગ્યા મંદિરિયે ને મંદિરિયેથી ઘરમાં
ક્યાંય અડીના આંચ એટલે દીવા માન્યા પાંચ
.
મ્હેતાજીએ મૂકી હોય તો ચશ્માંથી વંચાય
નરસૈંયાની ટાંચ એટલે દીવા માન્યા પાંચ
.
કોઈએ સાંધ્યા કાચ કોઈએ મન મોતી ને કાચ
આ તો સાંધી વાચ એટલે દીવા માન્યા પાંચ
.
ખમીસમાં જો હોત ક્યાંય તો બખિયા મારત પાંચ
પડી છે અંદર ખાંચ એટલે દીવા માન્યા પાંચ
.
જતાં જાતરા એક દિવસ પહોંચ્યા મંદિરની માંહ્ય
માંડી અઠંગ જાપ એટલે દીવા માન્યા પાંચ
.
પતંગિયાની પાંખેથી રજ જેમ ખરે છે અખ્ખર
લલિત તું ઈ વાંચ એટલે દીવા માન્યા પાંચ
.
( લલિત ત્રિવેદી )
