હું હરિનો આંગળિયાત;
હું ઝાંખો પડછાયો,હરિ તો સકળ અને સાક્ષાત !
હું હરિનો આંગળિયાત…
.
હરિવરની ગ્રહી આંગળી આવ્યો જગમોઝાર;
હરિ દોરે ત્યાં હું દોરાતો, ઉજાસ કે અંધાર;
પગલાં થોડાં ઠેબાં ઝાંઝાં હાથ હરિને હાથ !
હું હરિનો આંગળિયાત…
.
હરિએ મારા હાથમાં દીધી રૂડી તુલસીમાળા,
હું મણકાને બદલે ગણતો વગડાના ગરમાળા,
હરિએ કેવળ સ્મિત કર્યું, ઠપકાની તે શી વાત ?
હું હરિનો આંગળિયાત…
.
હરિએ દીધાં કલમ-પાટી ને કહ્યું: ઘૂંટ તું ઓમ,
ધૂળ ઉપર મારે તો લીંપણ, શું ધરતી શું વ્યોમ ?
હરિએ સ્પર્શ કર્યો પાટી પર વરસ્યાં પારિજાત…
હું હરિનો આંગળિયાત…
.
( ભગવતીકુમાર શર્મા )
