લઈ એક ‘ઠોસ નામ’ અમે હાલી નીકળ્યા
ખાલી કરીને ગામ અમે હાલી નીકળ્યા
.
બસ ‘નામની’જ પાટી ગળે બાંધી : બાકીનાં
સહુ ભૂંસી નામઠામ અમે હાલી નીકળ્યા
.
ઘેરી વળ્યા સંબંધ : અતિ કરગર્યા છતાં
સહુને કરી પ્રણામ અમે હાલી નીકળ્યા
.
દિવસે નહીં નિરાંત નહીં નિંદ રાતના
વિશ્રામ ના વિરામ અમે હાલી નીકળ્યા
.
ગોઠ્યું નહીં પ્રયાગમાં કે નાથદ્વારમાં
સહુ ત્યાગી તીર્થધામ અમે હાલી નીકળ્યા
.
જોયું નહીં કે માર્ગ કયો શ્રેયકર હશે !
નિષ્કામ કે સકામ : અમે હાલી નીકળ્યા
.
(અમૃત ઘાયલ)