હોય ના ગમતું-ઉર્વીશ વસાવડા
હોય ના ગમતું છતાં કરવું પડે
પાંદડાનું ભાગ્ય છે ખરવું પડે
.
શાહી થઈ આવી ગયો છું ટાંક પર
શબ્દ થઈ અંતે તો અવતરવું પડે
.
આ શિખરને સહેજ સ્પર્શીને તરત
હા તળેટીમાં પરત ફરવું પડે
.
બુદબુદાની જાત પામ્યા એટલે
હોય છીછરાં જળ છતાં તરવું પડે
.
બંધ મુઠ્ઠીમાં ભરેલી રેત છું
ક્યાં ખબર છે કઈ ક્ષણે સરવું પડે
.
ભીષ્મ તો હો લાખમં એકાદ બસ
અન્યને ઈચ્છા વગર મરવું પડે
.
( ઉર્વીશ વસાવડા )