તમે બે ઘડી જ રહી જુઓ કદી ચાહનાની કતારમાં
પછી આપોઆપ તમે હશો નરી વેદનાની કતારમાં
.
નથી ખુદની પણ પડી કોઈને-પછી વાત અન્યની શું કરું
જો મળી તો મા-ની જાત બસ મળી ખેવનાની કતારમાં
.
જો કરે તો કેમ કરે કહો એ વિવેચના કોઈ બિંબની
મળ્યા જોવા અંધજનો બધે મને આયનાની કતારમાં
.
અમે પણ જરૂર જશું કદી-દસ બાય દસના મહેલમાં
જીવ્યાં ફૂટપાથની ધૂળમાં એ જ કલ્પનાની કતારમાં
.
બહુ ઊંચા આસને બેસવાથી ફરક ગજામાં પડે નહીં
ઘણા મોટા માણસો જોયા છે મેં ટૂંકા પનાની કતારમાં
.
કદી સુખની સેજે યા રંગમોલે સગડ મળે નહીં એમના
સ્વની જાણવાની જીદે ચડેલા મળી ફનાની કતારમાં
.
જશે સર્વ એષણા અવગતે એ વિષે રુંવેરુંવુ જાણતું
છતાં સહુને સાહિલ જોઉં છું અહીં કામનાની કતારમાં
.
( સાહિલ )