શુષ્ક સરવરને મનાવી શું કરું ?
છે નર્યા મૃગજળ સજાવી શું કરું ?
મસ્તકે બીજો હિમાલય આવશે,
એક છે તેને હટાવી શું કરું ?
જે મળી ડાળી મને એવી મળી,
ફળ નથી લાગ્યા, નમાવી શું કરું ?
ફૂલ કાગળના નગરના હાટમાં,
ફૂલદાનીને વસાવી શું કરું ?
સાવ બહેરા કાન છે આ ભીડના,
તીર શબ્દોના ચલાવી શું કરું ?
જે પડે ગબડી હવાની ફૂંકથી,
મહેલ પત્તાંનો બનાવી શું કરું ?
આભ ક્યાં રૂમાલ રાખે છે હવે !
આંખને મારી રડાવી શું કરું ?
( આબિદ ભટ્ટ )
