અજાણી કોઈ ખુશબો ક્યાંકથી રસ્તામાં ઊતરી છે,
હવે એના વિશે આખી સભા ચર્ચામાં ઊતરી છે.
.
સમસ્યા ક્યાં હતી કૈં માનવીના આગમન પહેલાં,
બધી મુશ્કેલીઓ તો એ પછી દુનિયામાં ઊતરી છે.
.
કદાચ આ સૌ મકાનોને ઉથામો તો જડી આવે,
નથી જે શહેરમાં એવી ગલી નકશામાં ઊતરી છે.
.
ગમે ત્યાંથી ગમે તેની બુલંદી માપવા માટે,
ઘણા ખમતીધરોની આબરૂ ખાડામાં ઊતરી છે.
.
તમે મારા હૃદયમાં એમ આવીને પ્રવેશ્યા છો,
કે જાણે કોઈ પાગલ આગ આ તણખામાં ઊતરી છે.
.
હવે દીવાઓ પણ ભડકે ચડી પડદાઓ સૂંઘે છે,
હવા પણ વાળ છુટ્ટા વીંઝતી રસ્તામાં ઊતરી છે.
.
ખલીલ આજે તરસની આબરૂ સચવાય તો સારું,
બિચારી એકલી પાણી પીવા કૂવામાં ઊતરી છે.
.
( ખલીલ ધનતેજવી )
મોરપીંછ 