લિસ્સી, સુંવાળી, નજાકતભરી, રેશમી સંવેદનો કરતાં
ખરબચડી સંવેદના સાથે જીવવું હમણાં હમણાં મને વધુ ગમે છે.
કરકરાપણાનો પણ એક સ્વાદ હોય છે.
ઢાળ પર જળની જેમ ઢળવા કરતાં
પથ્થરના પગથિયાંનો સ્પર્શ વિશેષ જીવંત લાગે છે.
.
પથ્થર ગોળ હોય, ચોરસ હોય, લંબચોરસ હોય,
ચિત્રવિચિત્ર આકાર ધરાવતા હોય કે અણીદાર હોય
તો પણ મારો પથ્થર માટેનો પક્ષપાત વધતો જાય છે
દરિયાના પહાડ જેવા મોજાંની જેમ અથવા
દરિયા વચ્ચેના અડીખમ, નક્કર ખડકની જેમ.
.
આકાશ પાસે ચંદ્ર છે, તારા છે, નક્ષત્રો અને ગ્રહો છે.
પણ આકાશ પથ્થર વિના દરિદ્ર લાગે છે.
એની સરખામણીમાં ધરતી વિશેષ ગર્ભશ્રીમંત છે.
ફૂલ અને પથ્થરને એ અડખેપડખે ધારણ કરી શકે છે.
.
મને પથ્થર ગમે છે, કરું છું એને પારાવાર પ્રેમ
હું પથ્થરને શિલ્પીથી દૂર રાખવા માગું છું
જેથી એની ટાંકણું – હથોડી જેવી નજર
કોઈ પણ મૂર્તિને કંડારે નહીં !
.
( સુરેશ દલાલ )