તો શું કરવાનું ? – મધુમતી મહેતા

નામ કોઈનું જીભે આવી અટક્યું છે તો અટક્યું છે તો શું કરવાનું ?

એમ જ તો આ જીવનગાડું ગબડ્યું છે તો ગબડ્યું છે તો શું કરવાનું ?

 .

આંબા ડાળે કોયલ બોલે, મેના બોલે, ભમરા ડોલે મનડાં મોહે

આજે અમથું એક કબૂતર ફફડ્યું છે તો ફફડ્યું છે તો શું કરવાનું ?

 .

વાતે વાતે ગાણાં ગાયાં, રમતાં ગાયાં, જમતાં ગાયાં, એમ જ ગાયાં

ગાતા’તા ને ટપ્પક આંસુ ટપક્યું છે તો ટપક્યું છે તો શું કરવાનું ?

 .

ખાંખાખોળા ખૂબ જ કીધા અહીંયાં જોયું, ત્યાં પણ જોયું કાંઈ મળ્યું ના

સુખની પાછળ મન તો ભૈલા ભટક્યું છે તો ભટક્યું છે તો શું કરવાનું ?

 .

આખ્ખા ગામ વચાળે બેઠું પાણીમાં ને વાગ્યું નહીં ને આજે જંતર

ખાલી ખૂણે ઠાલું ઠાલું રણક્યું છે તો રણક્યું છે તો શું કરવાનું ?

 .

જીવ અમારો સાવ જ સુક્કા દિવસો સાથે વરસો સાથે માંડ હળ્યો ત્યાં

કોઈ સુંવાળી યાદી લઈને અડક્યું છે તો અડક્યું છે તો શું કરવાનું ?

 .

પાછળ હોય ઢોલ નગારા ને સામે મુરલીની માયા તો અવઢવમાં

મ્હેતાનું મન લીંબો થઈને લટક્યું છે તો લટક્યું છે તો શું કરવાનું ?

 .

( મધુમતી મહેતા )

Share this

6 replies on “તો શું કરવાનું ? – મધુમતી મહેતા”

Leave a Reply to hemant vaidya Cancel reply

Your email address will not be published. Required fields are marked *

This site uses Akismet to reduce spam. Learn how your comment data is processed.