જે કાયમ રહેતો દર્પણમાં એનો પીછો ક્યાંથી કરવો ?
અને લુપ્ત થઈ જાતો ક્ષણમાં એનો પીછો ક્યાંથી કરવો ?
.
આમ જુઓ તો સાચું છે ને આમ જુઓ તો આભાસી
મૃગજળ થઈને રહેતો રણમાં એનો પીછો ક્યાંથી કરવો ?
.
એ ગમતીલી પરીકથાઓ વાંચે એવી આંખો ક્યાં રહી ?
જે ખોવાયું છે બચપણમાં એનો પીછો ક્યાંથી કરવો ?
.
આજ લગી ભાગ્યો જેનાથી, એ મારો પડછાયો નીકળ્યો,
હું રહેતો તો એ મુંઝવણમાં એનો પીછો ક્યાંથી કરવો ?
.
હોઠમાં ઉપર આવ્યાં જે ગીતો એ આખી દુનિયા જાણે છે,
જે અટવાયાં છે લેખપમાં એનો પીછો ક્યાંથી કરવો ?
.
ગુપ્ત ગણીને શોધો ત્યારે પ્રગટ થવાનો એ પળભરમાં
જે સંતાયો છે કણકણમાં એનો પીછો ક્યાંથી કરવો ?
.
( ઉર્વીશ વસાવડા )
ઉર્વીશભાઇની સરસ,લયબધ્ધ ગઝલ….
ઉર્વીશભાઇની સરસ,લયબધ્ધ ગઝલ….
સુંદર રચના
સુંદર રચના