મારું કાંડું પકડીને મને રોક મા
મારી પાનીએ બેઠાં પતંગિયાંને ટોક મા
મારું કાંડું પકડીને મને રોક મા
.
અધખુલ્લી બારીથી જોયાં આકાશ,
અને જોયાં છે પંખીનાં ટોળાં;
હફળક દેતુંને કાંઈક અંદર જાગે,
ને પછી આંખોમાં સપનાંના મેળા;
પગલાંમાં હોંકારા પહેર્યા મેં આજ,
હવે બેસાડી ના દે તું ગોખમાં
મારું કાંડું પકડીને મને રોક મા
.
હોવું આ આપણું તો ઝાકળની જાત,
નથી પથ્થરમાં કંડાર્યા લેખો;
દરિયાને તળિયેથી ઊગી નીકળીએ,
જરા કાંકરિયું સાદની જો ફેંકો;
સાતે જન્મારાના સગપણને બે પળના
અળગાપણાથી તું જોખ મા.
મારું કાંડું પકડીને મને રોક મા
.
( મધુમતી મહેતા )