અજાણ્યાને ગણી ઈશ્વર બહુ આગળ જવાનું છે,
નવા અનુમાન આંખે ભર બહુ આગળ જવાનું છે.
.
નથી મંઝિલ સફરની કોઈ. છે પોતે સફર મંઝિલ,
સતત શરૂઆત પાછી કર બહુ આગળ જવાનું છે.
.
તેં આપી ઊંઘ વર્ષોને કર્યું સાકાર સપનું, પણ-
હવે છોડી દઈ એ ઘર બહુ આગળ જવાનું છે.
.
સડો પેસી જવાનો સહેજ પણ અટકાયું વચ્ચે તો
કિનારાના ફગાવી ડર બહુ આગળ જવાનું છે.
.
શરાફત, ખાનદાની ક્યાં સીમિત છે આ જનમ પૂરતી ?
ઘૂંટી લેજે અઢી અક્ષર બહુ આગળ જવાનું છે.
.
( શોભિત દેસાઈ )