આપણો નિષ્ફળ પ્રણય હંમેશ રાબેતા મુજબ,
ભાગતાં શૂન્યો વધે અવશેષ રાબેતા મુજબ.
.
આપનું હૈયું અજાણ્યા ગામ જેવું લાગતું,
હોય ક્યાંથી ભોમિયાનો વેશ રાબેતા મુજબ.
.
દર્પણો સામે રહીને કાંસકો દોષિત બન્યો,
ટેવવશ ખરતા રહે છે કેશ રાબેતા મુજબ.
.
ક્યાં તરે નાવડી મેહફૂઝ સાગરમાં કદી ?
કેમકે જળનો રહે છે દ્વેષ રાબેતા મુજબ.
.
એકદમ સીધી લીટીનો માર્ગ પણ વાંકો પડે,
જ્યાં મજલ થઈ સાંપડે જો ઠેસ રાબેતા મુજબ.
.
( ચિન્મય શાસ્ત્રી )