તમે પણ થૈ જશો, મિત્રો! અમર ખુશ્બૂની સોબતમાં
શરત એક જ કે જીવો ઉમ્રભર ખુશ્બૂની સોબતમાં
.
શમી ગૈ છે બગીચાની ઉંમર ખુશ્બૂની સોબતમાં
સફળ થૈ ગૈ પવનની પણ સફર ખુશ્બૂની સોબતમાં
.
બને કે કળીઓથી પણ ઝીણી ઝીણી પંક્તિઓ ઊઘડે…
ગઝલ મારી ય ખીલતી હો અગર ખુશ્બૂની સોબતમાં
.
દિવસ ઉદ્યાનમાં ઊગે ને રાત્રિ માળામાં સૂએ
મળી ગ્યું છે ભલું અમને ય ઘર ખુશ્બૂની સોબતમાં
.
લુડકતાં જાય છે ચકચૂર એક ફૂલેથી બીજે ફૂલ
અડી ગૈ કોને રિન્દાના લહર ખુશ્બૂની સોબતમાં
.
કળી શિવલિંગ હો એવી રીતે ઝાકળ કરે અભિષેક…
જડે સાક્ષાત એક કૈલાસ સર ખુશ્બૂની સોબતમાં !
.
( લલિત ત્રિવેદી )
મોરપીંછ 